Ferslach KNKB skoaljonges

27 mei 2018
Wilma
Nijs

Under simmerske waarsomstannigheden hiene we hjoed de skoaljonges op besite yn Easterein.

Om 11 oere wie it earst de beurt oan de 23 ôfdielingspartoeren om in plak yn de 2e omloop te bemachtigjen. Foar de
ferliezers wie der de mooglikheid om yn de opstapronde oan te slúten. Uteins hiene we nei de 1e omloop ôfdieling noch 13 twatallen oer yn de opstap t.i.l..

By de ôfdielingspartoeren hie Bitgum (Thom Dijkstra, Sjouke Beimers, Leon Wijning) in steand nûmer yn de heale finale. Niawier-Metslawier-Easternijtsjerk (Jan Bandstra, Jelmer Torensma) en Dronryp (Jorrit Nanninga, Rutger Kumbangsila, Rick Minnesma) makken der in wiere striid fan yn de heale finale wêryn Dronryp wûn mei 5-4/6-6. Hjirmei in 3e priis foar Niawier-Metslawier-Easternijtsjerk en in finaleplak foar Dronryp. Nei in lange, mar moaie keatsdei wie de finale in proai foar Dronryp, sy wûnen mei 5-3/6-0.

De 1e heale finale yn de opstap gie tusken Menno Johnson (Harns), Matthijs Renema (Hommerts) en Hylke Talsma (Achlum), Jildert Wijbenga (Arum). Hylke en Jildert wûnen mei 5-3/6-4. Jan Johannes van der Kamp (Nijlân), Pieter den Breejen (Arum) stiene yn de oare heale finale tsjinoer Jan Tymen Eisma (Frjentsjer), Wesley van der Vaart (Minnertsgea). Nei winst mei 5-4/6-2 behellen Jan Tymen en Wesley it oare plak yn de finale.

Jan Tymen en Wesley wiene krekt in maatsje te grut yn de finale tsjin Hylke en Jildert sjoen de sifers 5-2/6-0.